مالية عامة - الفصل الخامس - المؤثرات الخارجية واقتصاد السوق

بسم الله توكلت ع الله

.

.

بداية كده . . أي مشروع عايز يشتري أي حاجة من عوامل إنتاج . . بيتجه للسوق وبيشتري منه ويسدد التمن ع طول .

لكن في بعض الحالات بقي . . المشروع فيها بيحصل ع جزء من عوامل الإنتاج من غير ما يتجه للسوق أو حتي يسدد تمنها .

ازاي الكلام ده ؟!

علشان العوامل ديه مش بتتولد جوة السوق . . وبالتالي آثارها ع سلوك المستهلكين والمشروعات مش بيتحدد بقوي الطلب والعرض

, يعني من الآخر مش بيحصل ( اتفاق متبادل ) بين أطراف التعامل في السوق

وده بقي اللي بنسميه بـ " المؤثرات الخارجية Externalities "

والمؤثرات ديه بتحدث لو نشاط أحد الأطراف ( مستلهكين أو مشروعات )

أثر ع منافع أو إمكانيات الإنتاج للطرف الآخر من غير ما يسدد تمنها .

_______________

لو جينا بقي نقسم المؤثرات الخارجية ديه :

هيبقي فيه :

1/ مؤثرات إيجابية : ( الوفورات الخارجية أو المنافع ) يعني هيه المنافع اللي بيحصل عليها أحد الأطراف نتيجة نشاط الطرف الآخر من غير ما يسدد مقابل ليها .

2/ مؤثرات سلبية : ( النفقات الخارجية أو الضرر ) اللي بيصيب أحد الأطراف نتيجة نشاط الطرف الآخر من غير ما يحصل ع تعويض .

3/ مؤثرات من جانب واحد : ديه بقي الآثار المفيدة أو الضارة اللي بينقلها أحد أطراف النشاط للطرف الآخر .

4/ مؤثرات متبادلة : يعني سلوك كل طرف من أطراف التعامل بيأثر ع الأطراف الأخري .

________________

نيجي بقي لتقسيم المؤثرات الخارجية تبعا لنوع النشاط المحدث للآثار أو ( نوع الطرف المتأثر بهذا النشاط ) :

1/ المؤثرات الخارجية لمشروع ع مشروع .

2/ المؤثرات الخارجية لمشروع ع مستهلك .

.

.

1/ المؤثرات الخارجية لمشروع ع مشروع :

طبعا هنا النشاط الإنتاجي بيأثر بالإيجاب أو بالسلب ع إمكانيات إنتاج المشروع الآخر .

مثال1 لتأثير إيجابي : * قيام أحد المشروعات الاستخراجية باكتشاف أحد الحقول البترولية في منطقة جغرافية معينة .

هنا طبعا دفعوا كتير وأول ما طلع بترول . . نلاقي مشروعات تاني جات تعمل استخراج .

اهوه المشروعات التانية ديه استفادت بإنها قللت النفقات بتاعتها (( وجات ع الجاهز )) .

مثال 2 : * ييجي مشروع يعمل تدريب للعمالة بتاعته . . والعمالة ديه تشتغل في مشروع تاني .

اهوه المشروع التاني استفاد من العمالة الجاية ع الجاهز متدربة . . وبكده خفضت نفقات إنتاجها .

مثال 3 : * واحد اشتري حتة أرض وزرع فيها فواكه . . ييجي واحد يروح عامل جمبه منحل نحل .

اهوه هنا الراجل استفاد طبعا . . لما النحل يمتص رحيق الزهور . . والراجل طبعا مش هيسدد تمن ليها .

مثال 4 : * لما نلاقي واحد راح يصطاد سمك في مكان فيه صيادين بيصطادوا منه .

استفاد ومدفعش تمن ليها كمان .

لو جينا ركزنا شوية بقي . . هنلاقي إن المشروع اللي تعب وبادر واستكشف ودفع وعمل الأول . . مش هيقوم إلا بقدر قليل من النشاط . . فهيترتب عليه سوء تخصيص موارد المجتمع .

نيجي نشوف المشروع اللي استفاد ع الجاهز ومدفعش مقابل . . هنلاقيه بيتوسع طبعا لأنه وفر تكاليف كتير .

يعني من الآخر . . ممكن نلاقي مشروع من وجهة نظر أصحابه مش هيحقق أرباح , لكن هوه في منظر المجتمع مشروع مربح .

والعكس صحيح . . ممكن نلاقي مشروع من وجهة نظر أصحابه مربح . . لكن مش مربح للمجتمع .

وفي الحالات ديه بيعجز جهاز السوق عن توجيه الموارد نحو أفضل الاستخدامات من وجهة النظر القومية . . وهنا لازم الحكومة تتدخل .

2/ المؤثرات الخارجية لمشروع ع مستهلك :

برضه بيأثر بالإيجاب أو بالسلب ع منافع الأفراد . . اللي مالهمش علاقة أصلا بنشاط المشروع .

مثال : * مصانع كتير مبنية وبتسبب آثار سلبية ع الناس اللي ساكنين جمبها بما في ذلك كل حاجة تخص حياتهم من مرافق وصرف ووسائل انتقال . . وشوارع وهواء والحدائق والهدوء .

والمصانع ديه بتحط مدخلات الإنتاج في حساباتها بس . . لكن صحة المواطنين وكل الآثار الضارة اللي تخليه تتحمل نفقات . . (( في داهية )) .

امال مين اللي يدفع النفقات ديه ؟! . . أكيد المواطن التعبان

يصرف ع علاجه . . ع مشاكل المرافق العامة . . وكان الله في العون .

هنا بقي هنلاقي إن قيمة نفقة الإنتاج ع مستوي المشروع لا تساوي قيمة نفقة الإنتاج ع مستوي المجتمع .

وطبعا المشروع ممكن يكون مربح من وجهة نظر أصحابه . . علشان مش بيتحملوا النفقات الخارجية .

والعكس صحيح . . ممكن يكون خاسر من وجهة النظر القومية .

والخلاف بين الحسابات ع مستوي المشروع و ع المستوي القومي يتطلب تدخل الحكومة . . عشان المشروعات ديه تتحمل النفقة الحقيقية لنشاطها .

يتبـــــع , , ,